Vijesti CG

NJEMCI POTVRDILI DOMINACIJU

Njemačka u finalu Eurobasketa savladala Atamanovu Tursku 88:83

Finale za sve ukuse u Rigi je moralo da donese dramatičan finiš i nije razočaralo - na kraju slavi Njemačka drugu titulu u istoriji, tuguju Turska i Ergin Ataman. Konačnih 88:83 prikazuju uzbuđenja, tako je i bilo svih 40 minuta i ishod je takav da Turci još moraju da čekaju na zlato.

Davne 2001. u finalu EP su poraženi od Jugoslavije, a 24 godine kasnije je dugo izgledalo da su spremni na sve zamke koje im je postavila moćna Njemačka – popustili su u posljednja dva minuta, u momentima kada se svaka greška plaća višestruko. Njemačka je tako postala tek peta selekcija, nakon SFR Jugoslavije, SSSR-a, SR Jugoslavije i Španije koja je u isto vrijeme vlasnik i svjetskog i evropskog zlata. Turci su fantastično počeli meč, iskoristili prvih pet napada (tri trojke) i poveli 13:2 nakon dva minuta i 40 sekundi. Brzo se rival vratio, preokrenuo već do finiša prvog perioda – imala je Njemačka tada momentum, razigrao se Isak Bonga, a Alperen Šengun na drugoj strani ušao u problem s ličnim greškama. Džedi Osman je u tim trenucima znao da treba da preuzme ulogu lidera, a nakon plus jedan za Tursku na poluvremenu bilo je jasno da tek slijede prava uzbuđenja u nastavku. Imao je Atamanov tim plus šest u finišu 3. perioda, Njemačka je tada odgovorila serijom 8:0, ali Osmanova paljba je u posljednjoj dionici čuvala Turke na distanci…