Vijesti CG

HRVATSKA - CRNA GORA 4:0 (1:0)

Dobro smo i prošli…

Na tribinama - sportska, na momente i karnevalska atmosfera, a na terenu - razlika u kvalitetu, i to ozbiljna, očekivana. Za konačnih Hrvatska - Crna Gora 4:0 u meču kvalifikacija za Mundijal. Defanzivni blok Roberta Prosinečkog izdržao je 35 minuta, sve do momenta kada Hrvati individualnom akcijom nisu probili Crnu Goru.

Ni Luka Modrić, ni Ivan Perišić, ni Andrej Kramarić već – Kristijan Jakić, bek njemačkog Augsburga, koji je s desne strane ušao u sredinu i fantastičnim udarcem lijevom nogom sa ivice šesnaesterca pogodio sam ugao gola Danijela Petkovića. Do tada, “sokoli” su se i nekako držali, i pjesma oko tri stotine crnogorskih navijača probijala se kroz maksimirsku, na momente bučnu, a na momente i pozorišnu atmosferu, ali s obzirom na dominaciju “vatrenih” bilo je samo pitanje vremena kada će popustiti Robijevi ne baš čvrsti bedemi. Prosinečki je svojoj Hrvatskoj pokušao da napravi zasjedu, sa na papiru trojicom, odnosno petoricom, u većem dijelu prvog dijela i devetoricom igrača koji su stajali “iza lopte”. Nije to bila ideja koju je Veliki Žuti predstavio kada je prije godinu i po preuzimao Crnu Goru, ma koliko rival bio moćan i raznovrstan, mada je to bilo već davno… Možda takva igra i ima smisla ako se barem na momente otvori prilika za kontranapad, da se ugrozi protivnički gol. Nije bilo toga sinoć na Maksimiru, tek tri udarca naspram čak 33 hrvatska…